ХВ

Аще кто благочестивъ и боголюбивъ, да насладится сего добраго и свѣтлаго торжества.
Аще кто отъ перваго часа дѣлалъ есть, да пріиметъ днесь праведный долгъ.
Аще кто по третіемъ часѣ пріиде, благодаря да празднуетъ.
Аще кто по шестомъ часѣ достиже, ничтоже да сумнится; ибо ничимъ отщетевается.
Аще кто лишися и девятаго часа, да приступитъ, ничтоже сумняся, ничтоже бояся.
Аще кто точiю достиже и во единонадесятый часъ, да не устрашится замедленія: любочестивъ бо сый Владыка, приемлетъ последняго, якоже и перваго: упокоеваетъ въ единонадесятый часъ пришедшаго, якоже дѣлавшаго отъ перваго часа; и послѣдняго милуетъ, и первому угождаетъ, и оному даетъ, и сему дарствуетъ; и дѣла приемлетъ, и намѣреніе цѣлуетъ; и дѣяніе почитаетъ, и предложеніе хвалитъ.
Темже убо внидите вси въ радость Господа своего: и первіи, и вторіи, мзду пріимите.
Богатіи и убозіи, другъ со другомъ ликуйте.
Воздержницы и лѣнивіи, день почтите.
Постившійся и не постившійся, возвеселитеся днесь.
Никтоже да рыдаетъ убожества: явися бо общее Царство.
Никтоже да плачетъ прегрѣшеній, прощеніе бо от гроба возсія.
Воскресе Христосъ, и падоша демони.
Воскресе Христосъ, и радуются Ангели.
Воскресе Христосъ, и жизнь жительствуетъ.
Воскресе Христосъ, и мертвый ни единъ во гробѣ.
Тому слава и держава во вѣки вѣковъ. Аминь.